Навіны

Гангрэна

Учора, 5 траўня, быў Сусветны дзень гігіены рук. Актуальна ў цяперашнім каронавірусным свеце.

А яшчэ 5 траўня ў Беларусі - афіцыйны дзень друку. Ну, скажам шырэй, дзень сродкаў масавай інфармацыі. У гонар выхаду ў свет першага нумару расійскай камуністычнай газеты "Праўда". Добрая нагода для святкавання ў амаль 30 гадоў незалежнай Беларусі. Але сёння не пра гэта. Два гэтыя невядомыя шырокім народным масам дні сышліся, і не адрэагаваць было проста немагчыма.

Трэба прызнацца, я час ад часу гляджу беларускае телебачанне. Не тое, каб я быў псіхалагічным мазахістам, але ж мушу ведаць, што там людзям у галовы піхаюць. Ну вось і даводзіцца слухаць усе гэтыя прагібы і лізанні пэўнай часткі цела наймудрэйшага. Карацей, вынікам прагляду БТ і дня мыцця рук атрымаўся такі вось вершык:

Прысвячэнне Белтэлебачанню ў Сусветны дзень гігіены рук

Супраць віруса ёсць абарона.

У чысціні наша моц і сіла.

Каб не стаць ахвярай "кароны",

Мыем рукі старанна з мылам.

Гігіена - не словы пустыя,

Бруд не знойдзеш нават праз лупу.

А мазгі нам прамыюць тыя,

Што без мыла лезуць у дупу.

Вось так і жывем. Бóльшая частка - з прамытымі БТ мазгамі, меншая - з памытымі рукамі і яшчэ захаванай здольнасцю крытычнага мыслення. І гледзячы на паводзіны той большай часткі, так і хочацца сказаць, як той Понцій Пілат: "Я ўмываю рукі" - і да абсурду цяперашніх беларускіх рэалій падыходзіць, і да эпідсітуацыі. Бо глядзець на развіццё падзей і не вар'яцець патроху - немагчыма. Знішчае мозг і волю нешта рабіць не толькі (і не столькі) тое, што там Лукашэнка гаворыць ды прыдумляе. Усё беларускае грамадства ад верху да самага нізу прапітана - нібы губка вадою - страхам і хлусней. Страх першасны, хлусня як вынік страху. Пачынаецца усё ад самага нізу. Бо не ўлада піша пасмяротны дыягназ "пнеўманія невысветленай этыялогіі" ці там "сардэчная недастатковасць". Гэта дактары пішуць, бо ім так у адміністрацыі бальніцы загадалі. І маўчаць, і ідуць працаваць без належных сродкаў абароны, і хварэюць і паміраюць моўчкі. Гэта не Качанава ці Каранік адмаўляецца назваць лічбу хворых на каронавірус ў асобнай бальніцы - гэта мясцовы галоўны ўрач не адказвае на пытанні незалежных журналістаў. І так да самага верху. Амерта - прысяга маўчання мафіі. Парушальнік падлягае знішчэнню. Беларускае грамадства прагніла наскрозь. Гангрэна. Ці можна яшчэ вылекаваць - пытанне без адказу. Прагноз хваробы цяжкі, летальны зыход не выключаны.

Расказваюць пра смерць блізкіх людзей - але, калі ласка, не называйце імя! Толькі ананімна! Чаго ты баішся, жанчына??? Усё самае страшнае ўжо адбылося - твой блізкі чалавек памёр! Цябе што, расстраляюць ці ў ГУЛАГ пасадзяць? Усе нармальныя чалавечыя пачуцці паралізаваныя страхам, знішчаны за 26 гадоў панавання гэтай улады...

У якой ступені гэтая гангрэна знішчыла наша насельніцтва, убачым хутка - 9 траўня. Згоняць улады вялікі натоўп людзей, як пастух тое быдла, на "парад смерці" - усё, дыягназ беларускаму грамадству можна ставіць самы горшы. І тады ўжо не лячыць трэба будзе, а звяртацца да пахавальных службаў - і ў пераносным, а можа і ў прамым сэнсе. Паслухмянае племя тумба-юмба станчыць развітальны рытуальны танец з бубнамі на пацеху правадыру і шаману, перад тым як зысці ў нябыт. А калі ўсё ж застанецца той шаман з напаўпустымі трыбунамі - ну, тады можа ёсць яшчэ шанец на выздараўленне і цяжкую рэабілітацыю, на вяртанне да вартага жыцця нармальнага народа. Паглядзім. Чакаць канчатковага дыягназу засталося нядоўга.

Доктар Аляксандр Лобан.

Архіў

Кастрычнік 2021
123
45678910
11121314151617
18192021222324
25262728293031

Іншыя навіны

Відэа

праваабарончыя сайты